ՄԵՐ ՄԱՍԻՆ







ՀԻՄՆԱԴՐՈՒՄԸ ԵՎ ԱՆՑԱԾ ՈՒՂԻՆ

 «Հայ Միասնության Խաչ» բարեգործական մշակութային հասարակական կազմակերպությունը (այսուհետ` ՀՄԽ) ոչ քաղաքական, ոչ կրոնական, շահույթ ստանալու նպատակ չհետապնդող բարեգործական մշակութային հասարակական կազմակերպություն է:
Դեռևս 1987-ին գաղափարակիցներից կազմված մի խումբ սկսեց փոքր նախաձեռնություններով հանդես գալ հասարակական կյանքում՝ հոգատարություն և աջակցություն ցուցաբերելով բազմաթիվ ծնողազուրկ երեխաների:
1991-ին ՀՄԽ-ն գրանցվեց պաշտոնապես` դառնալով նորանկախ Հայաստանի Հանրապետության առաջին հասարակական կազմակերպություններից մեկը:
ՀՄԽ-ն մշտապես առաջնային է համարել կրթության և մշակույթի դերը աճող սերնդի զարգացման և կայացման գործում, իր գործունեության ընթացքում իրականացրել է բազմաթիվ կրթական, մշակութային, սոցիալական, իրազեկման ծրագրեր, որոնք ուղղված են եղել շահառուների և նրանց ընտանիքների բարօրությանը, զարգացմանը և քաղաքացիական հասարկության ձևավորմանը, այդ գործընթացին մասնակից դաձնելով նաև երեխաների ընտանիքներին և համայնքի անդամներին, ինչը նպաստում է ծրագրերի արդյունավետության բարձրացմանը:
2003 թվականից ՀՄԽ-ն որդեգրել է կրթություն արվեստի միջոցով մեթոդը և նախատեսում է շարունակել այս մեթոդի կիրառումը` կատարելագործելով և ընդլայնելով գործունեության շրջանակները: Կարևորելով երեխայի անհատականության դրսևորման և զարգացման գործընթացը, ՀՄԽ-ն իր սանին ցանկանում է տեսնել ոչ միայն արվեստի կամ արհեստի մեջ մասնագիտացած, այլ քաղաքացիական ակտիվ դիրքորոշում ունեցող, պատասխանատու և իրազեկ քաղաքացի:

ՀՄԽ-ն դավանում է Հայ Առաքելական եկեղեցուն 

«Կ'օրհնեմ Հայ Միասնության Խաչ կազմակերպութիւնը, ակնկալելով, որ ան մնայ իր կոչումին մէջ և մատաղ սերունդին սերմանէ բարի հունտեր»:

                      Ամենայն Հայոց Կաթողիկոս Վազգեն Ա-ի օրհնությունը 




ՏԵՍԼԱԿԱՆԸ
Ազգային և համամարդկային արժեքներ կրող, պաշտպանված, կիրթ և բարեկեցիկ հասարակություն:
Հայրենիքի և սփյուռքի բազմաշերտ սերտ համագործակցություն:




ԱՌԱՔԵԼՈՒԹՅՈՒՆԸ
Աջակցել քաղաքացիական ակտիվ դիրքորոշում ունեցող, կիրթ, իրազեկ, հայրենասեր, ազգային և համամարդկային արժեքներ կրող քաղաքացու ձևավորմանը և նրա սոցիալական վիճակի բարելավմանը, առանձնահատուկ ուշադրություն դարձնելով խոցելի խմբերին:
Նպաստել հայրենիքի և սփյուռքի գործուն կապի ամրապնդմանը:



ՀԻՄՆԱՐԱՐ ԱՐԺԵՔՆԵՐԸ

Սեր առ մարդը.
Մարդն այն բարձրագույն արժեքն է, հանուն որի՝ որպես քաղաքացի և անհատ ձևավորման, բարեկեցիկ կյանքի պայմանների ստեղծման, մենք ծավալում ենք մեր գործունեությունը: Եվ միայն մարդուն սիրելով է, որ կարող ենք, մեր հնարավորությունների սահմաններում, առավելագույնն անել նրա համար:


Սեր առ հայրենիքը.
Հայրենիքն այն կենսական միջավայրն է, որտեղ մարդն իրեն կարող է զգալ լիարժեք, ինքնադրսևորված, պաշտպանված, ազգային ու համամարդկային արժեքներին հաղորդակից: Հայրենասիրությունը մեզ մղում է լինել մեր գործին նվիրված:

Հավատ առ Աստված.
Առ Աստված հավատքը մեր հոգում ունենալով մենք միշտ կարող ենք համեմատել ու ճշտել մեր անելիքների ճշմարտացիությունը և հետամուտ լինել մեր նպատակների իրականացմանը, անկախ մեր առջև ծառացող խոչընդոտներից:

Հայրենիքի և սփյուռքի միասնականություն.
Հայրենիքն ու սփյուռքը մեկ միասնականություն են իրենց արմատներով ու ազգային իղձերով, նրանց կարողությունների համադրմամբ է, որ մենք ավելի արդյունավետ կարող ենք իրականցնել մեր նպատակները:

ԱՌԱՋՆՈՐԴՈՂ ՍԿԶԲՈՒՆՔՆԵՐԸ
Մեր գործունեության ընթացքում մենք առաջնորդվելու ենք հետևյալ սկզբունքներով`
  • Հարգել յուրաքանչյուրի անհատականությունն ու ինքնատիպությունը, նպաստել նրա ինքնադրսևորմանը:
  • Հասարակությանը ինտեգրված և քաղաքացիական ակտիվ դիրքորոշում ունեցող քաղաքացու ձևավորման լավագույն ճանապարհը նրան կրթելն ու մշակույթին հաղորդակից դարձնելն է:
  • Բարեկեցությունը և սեփական իրավունքների իմացությունը այն հիմքն է, որ հնարավորություն է տալիս անհատին լավագույնս ինքնադրսևորվելու:
  • Պատասխանատու և հայրենասեր քաղաքացին կրողն է ազգային և համամարդկային արժեքների:
  • Հայրենիքը և սփյուռքը հավասարազոր գործընկերներ են՝ ինչպես հայրենիքն ունի սփյուռքի կարիքը, այնպես էլ սփյուռքը՝ հայրենիքի, և միասնականությամբ է, որ կարող ենք ունենալ առավելագույն արդյունքներ:
  • Նվիրվածությունը մեր գործին: 
  • Յուրաքանչյուրի ներդրումը արժեքավոր է մեզ համար

ՄԵՐ ՊԱՏԳԱՄԸ

Արթնացիր ժպիտով,
Քայլիր ճախրելով,
Նկատիր կողքինիդ,
Խոսիր անկեղծ,
Լսիր համբերատար,
Օգնիր անշահախնդիր,
Սիրիր ջերմորեն,
Նվիրվիր անմնացորդ,


Գոհացիր քեզ տրվածով,
Հիացիր բնությամբ
Զարմացիր մանկան պես,
Պարգևիր ուրախություն,
Հիշիր արմատներդ,
Մի մոռացիր Աստծուդ,
բաց հոգուդ դռները,
Ձեռքդ մեկնիր ինձ,

Եղիր իմ բարեկամը...